روح أكتوبر،،، مصر يامه ،، عامية بقلم معوض حلمي -الفلاح الفصيح
روح أكتوبر،،، مصر يامه ،، عامية بقلم معوض حلمي -الفلاح الفصيح
مصـــر يامــــه ياسـاميه
صـوت قنـالك سمسـميه
في الصعيد النخوه قايده
واصـله عـزم السـيناويه
وف عيون المولى شايفك
ماشيه عايقه وسندسيه
مهـما حاولـوا يركعـوكي
ناس أبالسـه وغـــلاويه
راح ندوسهم ف المـعارك
ياللـي عزمــك بنــدقيه
فلاحيـــنك ع المــراوي
ملاحينك سـايقـه غــيه
والزنـاد سـهران ونـاوي
يحـمي ضهرك م الأذيه
…………………………..
مصـــر يامــه ياحــياتي
يام حضــن دفاه يواتي
العيال ف الغـيط بتزرع
والبنـات ف الـدار تهاتي
يام إيد بتفيـض محـبه
باكتــبك غنــوه لنـــياتي
الســنابل فيــكي حبــله
والمـراوي بتـروي ذاتـي
ع الحدود واقفين أسودك
ع السلاح صاحين يوماتي
ع الجسور فـلاح بيجمع
باميه خضرا وفول حراتي
إنتـي باقـــــيه للنــــهايه
مهـما كـان الظـلم عـاتي
……………………………
مصـر يامــــه ياحـــناني
ياصــــــبيه مجــــــنناني
راضـي بيـكي ياحبـيبتي
وانتـي ضـــله مطمـناني
بيتي جـنه لـو ف عـشه
ع التـراب الاســــــمراني
والعصــاري ف الطـراوه
ع المـدار تحـلى الأغاني
ع السكك نتمشى صحبه
فـي البـراح الأخضـراني
الهــــوا حواليـــنا طـاير
والســـجر ملـيان أمـاني
الســواقي دايــرة تــدن
والطيور لها شـكل تاني
…………………………..
مصـر يامــــه ياأمـيرتي
باعشقك انا مهما جورتي
انتي نبض حياه بيجري
جـوا شـرياني الأورطـي
لمـا جـاني البرد شــاقق
كنتي حمل الصوف ف أوضتي
في الغيطان من غير ماانادي
تبقـي فاسـي ياحبيـبتي
لما بابعـــد عـــن ترابك
بابقى ميت فيكي إنتي
مـــدي إيـدك لملمــــيني
من شتاتي واهدي حيرتي
علـي صـوتك هتلاقيني
قلـت جايـلك ياأمــيرتي
…………………………..
مصـــر يامــــه ياحبـيبه
يام قلـب حـنان وطيبه
الولاد ف الحاره طارحك
والبنـات مايحـــبوا عيبه
عاشوا يامه يحروسوكي
والعقـول فيـــهم نجيبه
مصـــر يادره ف زمـانك
بين بلاد الكـون عجيبه
التـرع فـي الدلـتا آيـــه
والمـــراوي بتروي هيبه
الهوا في الريف مداوي
ع المصاطب جنب شيبه
وف براح الجورن غنوه
مصـــر يامـــه ياحبيـبه
…………………………
مصـر ياساقيه وعفيه
ونيل بيملى المشربيه
بامشي واتغندر واغني
لو تطلي ف يوم عليا
إنتي ست الكون وأمي
ياللي ضيك نور عينيا
زرعتك والله طارحـه
ف القلوب أبيضـها نـيه
والقى حضنك لم خوفي
لـو تزيــد الأهـــه فـيا
توهـبي دمعـك مـداوي
تسـهري جنبي مراعيه
ضحكـتي واللـه تحلى
وف إيديكي تنام إيديا
ـــــــــــــــــــــــــــــــــــــــــــــــــــــــ
