أطفال فاشر … عامية بقلم حسن أبو عرب
أطفال فاشر … عامية بقلم حسن أبو عرب
الأطفال أحباب الله
وانت حبيبك يطلع مين؟!
يا اللى ضميرك منَّك تاه
وبقيت ضال مع الضالين
تقتل طفل! عملَّك ايه!!
تدفِنُه حى باسم الدين
هِوَّ الطفل دا ايه اللى جنَاه
تحرق قلب امُه المسكين
تصرخ تنده معتصماه
صحرا قلوب ولناس نايمين
بدروا الشر فطرح الآه
شنقوا الدمعه فى نن العين
فاق الظلم حدوده مداه
بإدين مرتزقه وظالمين
طفوا قناديل قلبنا وضياه
عمدًا داسُوا على الياسمين
ياه م الظلم ومليون يااه
لبشر تهتف بالملايين
زى تيُوس قطعَان لشيَاه
تنطح بعض وتاكُل طين
صار صبحنا يشبه لِمِسَاه
منصوب لنا مِية ألف كمين
امته الورد يبُوسُه ندَاه
وتعود لنا بدر وحطين
وبلال يِدن من جوَّاه
كل الدنيا تقول له آمين
نظرة رضا يارسول الله
لسه الخير فى قلوب صالحين
