أبقي فاطر ؟! ….شعر عامية بقلم / حمدي موسى
أبقي فاطر ؟! ….شعر عامية بقلم / حمدي موسى
جه سألنى..قلت اقول له
هى سيرتك وانتى بجمالك دا كله
تفسد الصوم والصلاة
يعنى لو فجأة افتكرتك
والا سيبت القلب وجريت انتظرتك
عند باب الحب والشوق والحياة
حتى لو فيها المخاطر
أبقي فاطر ؟!
طب شفايفك لو قالت لى تعالي..قرب
ممكن اعمل ليها خاطر يعنى اجرب
لو هادوق العمر من كلمة باحبك
حتى لو هادخل بشوقي واقول ياساتر
أبقي فاطر ؟!
طب عيونك لو هنام فيهم شوية
واصحى قبل المغربية
وانتى عارفه عنيكى عذبة
وقلبي نفسه ف بق مية
لو أخدت ابريق عشان اغسل عينيه
وانفتح ف القلب مجرى.
اتسرب النور م القناطر
.أبقي فاطر ؟!
طب باحبك بالبراءة اللي ف حروفها
حتى لو كت فى التلات أيام ظروفها
وقلتهالك غصب عنى
وسيبت نفسي للتمنى…
واما توهت وروحت اغنى
كتبتهالك فى الدفاتر
أبقي فاطر ؟!
بدى فتوى
لو يكون القلب تايه غير عنيكي مالوهش متوى
فاستخبي تحت جفنك
وانتشر وبقى له سطوة
سيطرت أحلامه ع النور
يبقي شاطر ؟
والا يبقي لأنه حبك حب فاق
المنطقى والعادى فاطر ؟!
